Për herë të parë bie edhe shitja e ekraneve LCD

Sipas të gjithë treguesve të shtëpisë analitike DisplaySearch, trendi i rënies së shitjes e ka përfshirë edhe tregun e ekraneve LCD.

Sipas raportit të DisplaySearch, tremujori i katër i vitit 2008 sipas numrit global të shitjeve ka qenë më i ulët për 7.4 për qind në krahasim me të tretin, respektivisht tetë për qind më i ulët në krahasim me tremujorin e njëjtë të vitit 2007. Numri i përgjithshëm i shitjeve të ekraneve LCD në mbarë botën në tremujorin e katërt të vitit 2008, ka qenë 39.6 milionë njësi.

Megjithatë, sa u përket prodhuesve të veçantë, vetëm dy kanë shënuar ngritje të shitjes në krahasim me të dhënat e vitit të kaluar, dhe atë udhëheqësi i tregut Samsung dy për qind dhe i pesti me radhë në listën e prodhuesve të ekraneve LCD, Acer, me nëntë për qind.

Prodhuesit tjerë kanë shënuar rënie të shitjeve, dhe atë Dell me 19 për qind, i cili megjithatë ka arritur të ruaj vendin e dytë në listën e prodhuesve. HP gjithashtu përkundër rënies ka arritur të mbajë vendin e tretë, e LG vendin e katërt.